Telephone:
+94779456435

Email:
editor.todaynewslk@gmial.com

නඩු තීන්දුවෙන් පසු ගලගොඩඅත්තේ ඥානසාර හිමි අතුරුදන්!

2 months ago

බොදු බල සේනා සංවිධානයේ මහලේකම් ගලගොඩඅත්තේ ඥානසාර හිමියන්ට 2019 වසරේදී හිමි වූ ජනාධිපති සමාව ශ්‍රේෂ්ඨාධිකරණය විසින් අහෝසි කිරීමෙන් පසුව එම භික්ෂුව සොයාගැනීමට නොහැකිව ඇති බව වාර්තා වේ.

අධිකරණයට අපහාස කිරීමේ චෝදනාවට නියම වූ වසර හයක සිරදඬුවමෙන් ඉතිරි කොටස ගෙවා දැමීම සඳහා උන්වහන්සේ නැවත බන්ධනාගාරගත කිරීමට අවශ්‍ය පියවර ගැනීම උදෙසා බන්ධනාගාර නිලධාරීන් රාජගිරිය, නාවල පිහිටි විහාරස්ථානය වෙත ගොස් ඇති බව ‘The Sunday Island’ පුවත්පත වාර්තා කරයි.

කෙසේවෙතත්, උන්වහන්සේ දැනට සිටින ස්ථානයක් පිළිබඳව තමන් නොදන්නා බව විහාරස්ථානයේ සිටි අනෙකුත් භික්ෂූන් වහන්සේලා දැනුම් දී තිබේ.

2019 මැයි මාසයේදී හිටපු ජනාධිපති මෛත්‍රීපාල සිරිසේන මහතා ලබා දුන් අදාළ ජනාධිපති සමාව අත්තනෝමතික වන අතර, එමගින් මහජන විශ්වාසය සහ ස්වාභාවික යුක්තියේ මූලධර්ම උල්ලංඝනය වී ඇති බව ත්‍රිපුද්ගල ශ්‍රේෂ්ඨාධිකරණ විනිසුරු මඬුල්ල තීන්දු කළේය.

2019 දී ජනාධිපති සමාව හිමි වන විට මාස නවයක සිරදඬුවමක් පමණක් විඳ තිබූ බැවින්, ඥානසාර හිමියන්ට නියමිත වසර හයක සිරදඬුවමෙන් වැඩි කොටසක් ඉදිරියේදී බන්ධනාගාරය තුළ ගෙවාදැමීමට සිදුවනු ඇත.