Telephone:
+94779456435

Email:
editor.todaynewslk@gmial.com

නියම වූ දඩ මුදලේ ඉතිරි ලක්ෂ 90ක මුදල ගෙවීමට ප්‍රසන්න රණතුංග සහන කාලයක් ඉල්ලයි

2 weeks ago

කොළොන්නාව, මීතොටමුල්ල ප්‍රදේශයේ ඉඩමක් ගොඩ කිරීමට අනුමැතිය ලබාදීම සඳහා ව්‍යාපාරිකයෙකුගෙන් රුපියල් මිලියන 64 ක කප්පම් මුදලක් ඉල්ලා තර්ජනය කිරීමේ සිද්ධියට වරදකරු වූ හිටපු අමාත්‍ය ප්‍රසන්න රණතුංගට නියම කළ දඩ මුදලේ ඉතිරි කොටස ගෙවීම සම්බන්ධයෙන් කරුණු සලකා බැලීම සඳහා ලබන වසරේ පෙබරවාරි 01 වැනිදා යළි නඩුව කැඳවන ලෙස නියෝග කර තිබෙනවා.

කොළඹ මහාධිකරණය නියම කළ රුපියල් මිලියන 25 ක දඩ මුදලින් ඉතිරිව ඇති රුපියල් ලක්ෂ 90 ක මුදල අද (05) ගෙවීමට නියමිතව තිබුණු අතර, අද නඩුව කැඳවූ අවස්ථාවේදී ප්‍රසන්න රණතුංග සිය නීතිඥවරයා මාර්ගයෙන් අධිකරණයෙන් ඉල්ලා සිටියේ ඉතිරි මුදල ගෙවීම සඳහා තවත් කාලයක් ලබාදෙන ලෙසයි.

ඉඩමක් ගොඩ කිරීමට අවසර ලබාදීම සඳහා 2015 අප්‍රේල් 10 වැනිදා මොරටුව ප්‍රදේශයේ ව්‍යාපාරිකයෙකු වන එස්. ක්‍රිස්ටියන් ගිහාන් මෙන්ඩිස්ගෙන් රුපියල් මිලියන 64 ක මුදලක් ඉල්ලා, ඉන් රුපියල් මිලියන 15 ක් ලබාගෙන, බිය ගන්වා මුදල් අය කිරීම සම්බන්ධයෙන් ප්‍රසන්න රණතුංගට එරෙහිව මෙම නඩුව පවරා තිබුණා.

නඩු විභාගයෙන් අනතුරුව 2022 ජූනි 06 වැනිදා තීන්දුව ප්‍රකාශයට පත් කළ කොළඹ මහාධිකරණය ප්‍රසන්න රණතුංග වරදකරු බවට තීන්දු කළ අතර, ඒ අනුව ඔහුට බරපතළ වැඩ සහිතව වසර දෙකක සිර දඬුවමක් නියම කර, එය වසර පහකට අත්හිටුවීමටත්, ඊට අමතරව රුපියල් මිලියන 25 ක දඩයක් සහ අගතියට පත් ව්‍යාපාරිකයාට රුපියල් මිලියනයක වන්දියක් ගෙවන ලෙසත් නියම කර තිබෙනවා.