කොළඹ නගරාධිපති නිල නිවෙසේ නඩත්තු වලට හිටපු පුරපති රෝසි සේනානායක මහත්මියගේ ධුර කාලය තුළදී පමණක් රුපියල් කෝටි දෙකකට අධික මුදලක් වැය කර තිබෙන බවට වාර්තා වෙනවා.
සමගි ජන බලවේගයේ හිටපු පාර්ලිමේන්තු මන්ත්රී මුජිබර් රහුමාන් සහ කොළඹ මහ නගර සභාවේ හිටපු මන්ත්රීවරුන් විසින් තොරතුරු දැන ගැනීමේ පනත යටතේ ලබාගත් තොරතුරු අනුව මේ බව අනාවරණය වී තිබුණා.
හිටපු පුරපති රෝසි සේනානායක කොළඹ නගරාධිපතිනිය ලෙස සිටි වසර හතරක කාලය තුළ නිල නිවෙසේ නඩත්තු කටයුතු වෙනුවෙන් මෙලෙස රුපියල් කෝටි දෙකකට අධික මුදලක් වැය කර තිබෙනවා.
නිල නිවෙසේ ප්රතිසංස්කරණ කටයුතු වෙනුවෙන් පමණක් රුපියල් හතළිස් හතර ලක්ෂ දෙදහස් හාරසීයක් ද, 2018 වර්ෂයේදී වැඩිදියුණු කිරීම් කටයුතු වෙනුවෙන් රුපියල් විසිදෙලක්ෂ අනූතුන්දහස් හත්සීයක්ද වැය කර තිබෙන බව සඳහන්.
නගරාධිපති නිල නිවෙස වටා ඇති තාප්පයේ උස වැඩි කිරීම හා අලුත්වැඩියා කිරීම වෙනුවෙන් 2019 වර්ෂයේදී රුපියල් දහසය ලක්ෂ දහසය දහසක් ද එම වසරේම ගෘහ භාණ්ඩ වෙනුවෙන් රුපියල් ලක්ෂ දහයකට අධික මුදලක් වැය කර තිබෙනවා.
2020 වර්ෂයේදී රුපියල් තිස් නවලක්ෂ අසූ දෙදහසක් ද 2021 වර්ෂයේදී දාහතර ලක්ෂ අසූහත්දහසක්ද ගෘහ භාණ්ඩ වෙනුවෙන් වැය කර තිබෙනවා.

