අලුත් අවුරුද්ද උදාවෙද්දී වෘශ්චිකයේ ලග්නාධිපති කුජ සෙනසුරු සමඟ ලග්නයෙන් හතරේ කේන්ද්රගතව ගමන් කරන අතර, බුධ, සිකුරු, රාහු පස්වැන්නේද රවි, ගුරු හයේ, සඳු අටේ කේතු, අයස්ථානයේද ගමන් කරයි. ශනිගෙන් සස යෝගය රවිගෙන් මයුරපාල යෝගය සිකුරුගෙන් මාලවී යෝගයද යෙදී ඇත. උපතේදී සඳු හතරේ සිටි අයට ජන්ම ඒරාෂ්ටකය ද යෙදේ.
ගෘහ ජීවිතය
මිශ්රපල ගෙන දෙන කාලයකි. තදබල අපල නොවේ. දැහැමෙන් කටයුතු කරන අයට අපලවල අගුණ ඇතිවීම අඩුය. අධර්මවාදී අයට වැඩි අපල ඇතිවේ. වාහන ඉඩම් ගේ දොර වැනි ලැබීම් ද ඇති විය හැකිය. පවුලේ විශේෂ අයෙකුට ධන ලාබ වාහන ලාභ හිමි වන බව පෙනේ. විවිධ ස්ථානයන්හි සංචාරය කරන්නත් විසිතුරු දේ ලබා ගැනීමටත් පෙලඹෙන කාල සීමාවකි. හොඳ ආහාර පාන සංග්රහයන්ගෙන් ඔබට අඩුවක් නොවේ. යන යන තැන කෑම බීම ලැබෙයි.
වාසානවන්ත දරු උපත් හිමි වේ. කුජ දශා ගත කරන අය ආධ්යාත්මික අංශයටද යොමු වේ. ගුරු දශා ගත කරන අය තම ගෘහ ජීවිතය පිළිබඳව වඩාත් සැලකිලිමත් විය යුතුය. ඒ සතුරු කරදර ඇති විය හැකි බැවිනි. මැයි සිට තත්ත්වය යහපත් වේ. කරන කියන කටයුතු දියුණු වේ. ගෞරව සම්මාන හිමි වේ. සෙනසුරු දශා ගත කරන අයටද එතරම් වරදක් නැත. සමාජයේ විශ්වාසය දිනාගෙන කටයුතු කළ හැකිය.
ගේ දොර ඉඩකඩම් හිමිවේ. සිකුරු දශා ගත කරන අයට මංගල යෝග උදා වේ. දියුණුව ඇති වේ. ගමන් බිමන් යෙදේ. බුධ දශා ගත කරන අයට ද ධන ලැබීම් ඇති කරන අතර, කරන කියන කටයුතු දියුණු වේ. රාහු දශා ගත කරන අයට ගමන් බිමන් යෙදේ. කේතු දශා ගත කරන අයට භූමියෙන් ලැබීම් ඇති වේ.
රැකියාව හා ආර්ථිකය
රැකියා ස්ථාන මාරු යෙදිය හැකිය. එහෙත් රැකියා අංශ දියුණු වේ. රවි දශා ගත කරන අයටද රැකියා ලාබ ඇති වේ. ඒවා දියුණු වේ.
අධ්යාපනය
පොදුවේ ගත් කල ඉගෙනීම්වලට යම් යම් බාධා ඇතිවේ. එහෙත් අධ්යාපන කටයුතු දියුණු වේ. බුධ දශාගත කරන ඉගෙන ගන්නා අයට යහපත්ය. සඳු දශා ගත කරන අයට ද යහපත්ය. වගකීමෙන් යුතු දොස් නාසන ආකාරයට කටයුතු කළ හැකිය. ගමන් බිමන් විදේශ ගමන් යෙදේ. රාහු දශා ගත කරන අයගේ ඉගෙනීමේවලට බාධා ඇති වේ. අධ්යාපනික කටයුතුවලට වරදක් නැත.
තමන් උගත් කරුණු අනුව ප්රසිද්ධිය ඇතිවීමට ඉඩ තිබේ. ගුප්ත විද්යා ඉගෙනීම්වලට ද ඉතා සුබයි. මැයි සිට දරුවන්ගේ කටයුතු දියුණු වෙයි.
සෞඛ්යය
ගුරු දශා ගත කරන අයට රෝගපීඩා යෙදිය හැකිය. උෂ්ණ රෝග මෙන් ඇස්වල පීඩා ඇති විය හැකිය. සෙනසුරු දශා ගත කරන අයට වාත රෝග පීඩා ඇතිවිය හැකිය. ඇස්වල අමාරුද යෙදිය හැකිය.
අය – 11 වැය – 14
සුබ වර්ණය – රතු
සුබ මැණික් – පුෂ්පරාග,
ජය දින – ඉරිදා
සුබ දිශාව – උතුර
ජය අංක – 1,2,10
(ඡ්යොතිෂවේදී සෝමපාල විජේසූරිය – සුබසෙත)
