ශ්රී ලංකාවේ පුරවැසියකු නොවන බව දැන දැනම පාර්ලිමේන්තු මන්ත්රීවරියක හා රාජ්ය අමාත්යවරියක වශයෙන් වසර 04කට ආසන්න කාලයක් කටයුතු කිරීමෙන් රාජ්ය මුදල් හා දේපළ අවභාවිත කිරීම සම්බන්ධයෙන් හිටපු රාජ්ය අමාත්ය ඩයනා ගමගේ මහත්මියට එරෙහිව අල්ලස් හෝ දුෂණ චෝදනා විමර්ශන කොමිසම විමර්ශන ආරම්භ කර තිබෙනවා.
හිටපු රාජ්ය අමාත්ය ඩයනා ගමගේ මහත්මිය පාර්ලිමේන්තු මන්ත්රීවරියක හා රාජ්ය අමාත්යවරියක වශයෙන් කටයුතු කරමින් රාජ්ය මුදල් හා දේපළ අවභාවිත කර අල්ලස් පනතේ සඳහන් දුෂණය නමැති වරද කර ඇති බවත් ඇයගෙන් එම මුදල් අය කරගන්නා ලෙසත් ඇයට විරුද්ධව නඩු පවරන ලෙසත් ලැබුණු පැමිණිල්ලකට අනුව මෙම විමර්ශනය ආරම්භ කර තිබෙන බවට වාර්තා වනවා.
එම පැමිණිල්ල ‘අල්ලස දූෂණය හා නාස්තියට එරෙහි පුරවැසි බලය’ සංවිධානයේ සභාපති කාමන්ත තුෂාර මහතා විසින් අල්ලස් කොමිසම වෙත ඉදිරිපත් කර තිබෙනවා.


