කොළඹ නගර සභා බලප්රදේශය තුළ රථ වාහන ගාල් කිරීම සඳහා නව ක්රමවේදයක් හඳුන්වා දීමට පියවර ගෙන ඇති බව කොළඹ මහනගර සභාවේ රථවාහන අංශයේ නියෝජ්ය අධ්යක්ෂ මංජුල කුලරත්න මහතා පැවසීය.
අධ්යක්ෂවරයා පැවසුවේ, ඒ අනුව ඉදිරියේදී එක කලාපයක් සඳහා එක් කොන්ත්රාත්කරුවෙකු යෙදවීමට නියමිත බවයි.
ඔහු එහිදී වැඩිදුරටත් කියා සිටියේ,
“කොළඹ නගර සීමාව තුළ රථවාහන ගාල් කළමනාකරණය විධිමත් කිරීම සඳහා දැනට පවතින මාර්ගවල කොන්ත්රාත්කරුවෙක්, පරිපාලකයෙක් පත්කරන ක්රමය වෙනුවට අපි දැන් යම්කිසි කලාපයක් සඳහා කොන්ත්රාත්තුවක් එන විදියට කටයුතු සිදුකරමින් පවතිනවා. බොහෝවිට තව මාස 3ක් වගේ ඇතුළත ක්රියාත්මක වෙනවා. ඒ කලාපය තුළ රථ වාහන ගාල් භාවිත කරන පාරිභෝගිකයින්ට වාසිදායක තත්ත්වයක් ඇති වෙනවා. මොකද දැනට එක මාර්ගයක රථ නවත්තලා ආසන්නම කාලයේ තව කාලයක් ඉතිරිවෙලා තිබිලා ගාල් කළොත් ඒ ටිකට් එකම භාවිත කරන්න බැරි තත්ත්වයක් තියෙනවා. කලාපය තුළ ක්රියාත්මක කිරීමේ දී රියදුරන්ට වාසියක් ලැබෙනවා අදාළ කලාපය තුළ පැයක් වගේ ඇතුළත ස්ථාන දෙක තුනක වුණත් ගාල් කිරීමට හැකියාව ලැබෙනවා.”
මංජුල කුලරත්න මහතා වැඩිදුරටත් සඳහන් කර සිටියේ ඉදිරියේ දී රථවාහන ගාල් කරන ස්ථාන සඳහා විවිධ තාක්ෂණික ක්රමවේදයන් යොදා ගැනීම සඳහා සැලසුම් කර ඇති බවයි.


