වසර 130ක් පැරණි ඓතිහාසික වටිනාකමකින් යුත් නුවරඑළිය තැපැල් කාර්යාල ගොඩනැගිල්ල සම්බන්ධයෙන් මෙතෙක් ගත් සියලු තීරණ අත්හිටුවන බව අමාත්ය විජිත හේරත් මහතා අද (09) පැවසීය.
පසුගිය රජය සමයේ නුවරඑළිය තැපැල් කාර්යාල ගොඩනැගිල්ල හෝටල් ව්යාපෘතියක් සඳහා පෞද්ගලික අංශයට පැවරීමේ ක්රියාවලියක් සම්බන්ධයෙන් දැඩි කතාබහක් ඇති විය.
150 වන ලෝක තැපැල් දිනය වෙනුවෙන් අරලියගහ මන්දිරයේ පැවැති උත්සවයකට එක්වෙමින් මේ සම්බන්ධයෙන් අදහස් දැක් වූ අමාත්ය විජිත හේරත් මහතා,
“නුවරඑළිය තැපැල් කාර්යාල ගොඩනැගිල්ල පසුගිය කාලයේ බලහත්කාරයෙන් පවරා ගැනීමට තීන්දු ගත්තා. නව රජයේ නව ජනාධිපතිතුමාගේ ප්රතිපත්ති අනුව නුවරඑළිය තැපැල් කාර්යාල ගොඩනැගිල්ල සහ එම භූමිය මින් ඉදිරියට තැපැල් දෙපාර්තමේන්තුවේ කටයුතු සඳහා පමණක් අපි වෙන් කරනවා. ඒ්ක වෙන කාටවත් ලබා දෙන්නේ නැහැ. ඒ සඳහා මෙතෙක් ගෙන ඇති තීන්දු තීරණ සියල්ල අපි අත්හිටුවනවා.”

