Telephone:
+94779456435

Email:
editor.todaynewslk@gmial.com

බදුල්ලේ බස් අනතුරට හේතුව කාර්මික දෝෂයක්ද? නැතිනම් අධික වේගයද?

2 years ago

බදුල්ල, දුන්හිඳ බස් රථ අනතුර සිදුවූයේ කාර්මික දෝෂයකින්ද, නැතහොත් රිය ධාවනයේ අපරික්ෂාකාරී බව හේතුවෙන්දැයි සොයා පොලිස් විමර්ශන ක්‍රියාත්මක කර තිබෙනවා.

අනතුරින් තුවාල ලැබූ 34 දෙනෙකු තවදුරටත් රෝහල්ගතව ප්‍රතිකාර ලබන අතර මියගිය සිසුවියන්ගේ අවසන් කටයුතු අද (03) සිදුකළා.

බදුල්ල – මහියංගන ප්‍රධාන මාර්ගයේ දුන්හිඳ ඇල්ල ප්‍රදේශයේදී කොතලාවල ආරක්ෂක විශ්වවිද්‍යාලයේ සිසුන් රැගත් බස් රථයක් අනතුරට ලක්ව සිසුවියන් දෙදෙනෙකුට දිවි අහිමි වී තවත් 40දෙනෙකු තුවාල ලැබීමේ සිද්ධිය වාර්තා වූයේ පසුගිය පළමුවනදායි.

අනතුර සිදුවීමට මිනිත්තු කිහිපයකට පෙර අදාළ බස් රථය වේගයෙන් ධාවනය කෙරෙන ආකාරය මෝටර් රථයක සවිකර තිබූ කැමරාවක ද සටහන්ව තිබුණා.

බදුල්ල ජ්‍යෙෂ්ඨ පොලිස් අධිකාරි වසන්ත කන්දේවත්ත මහතා පවසා තිබුණේ බස් රථය සම්බන්ධව රස පරීක්ෂක වාර්තාවක් ලබාගැනීමට නියමිත බවයි.

අනතුර සිදුවන අවස්ථාවේ රියදුරු බස් රථය තුන්වන හෝ සිව්වන ගියරයේ ධාවනය කරන්නට ඇති බවට පොලීසිය සැක පළකරනවා.

එවැනි අවස්ථාවක කිලෝමීටර් 4ක් පමණවන බෑවුම් සහිත ප්‍රදේශයේදී රථය වේගයෙන් ධාවනයවීමෙන් ලිස්සා ගොස් මාර්ගයේ ඉවතට ධාවනයවී අසළ පස් කන්දෙහි ගැටෙන්නට ඇති බවට විමර්ශන නිලධාරීන් සැක පළකරනවා.

කෙසේවෙතත් අදාළ අනතුර සිදුවූයේ කාර්මික දෝෂයකින්ද, නැතහොත් ධාවනයේදී සිදුවූ ගැටලුවක් හේතුවෙන්දැයි සොයා පොලිස් විමර්ශන ආරම්භ කර තිබෙනවා.

විශේෂයෙන් අනතුරට ලක්වන අවස්ථාවේ බස්රථය ධාවනය වූ ආකාරය පිළිබඳව තාක්ෂණානූකූලව විමර්ශනය කිරීමටත් පොලීසියේ අවධානය යොමුවී තිබෙන බවයි පැවසෙන්නේ.