රුපියල් 1.500ක අල්ලස් මුදලක් ගත පොලිස් නිලධාරීන් දෙදෙනෙක් ලබන 12 වනදා දක්වා රක්ෂිත බන්ධනාගාර ගත කිරීමට නිකවැරටිය මහේස්ත්රාත්වරයා විසින් අද නියෝග කර තිබෙනවා.
එදිනට සැකකාර පොලිස් නිලධාරීන් දෙදෙනා හඳුනාගැනීමේ පෙරට්ටුවක් සඳහා ඉදිරිපත් කරන ලෙසයි අධිකරණය නියෝග කර ඇත්තේ.
මෙලෙස රක්ෂිත බන්ධනාගාර ගතකර ඇත්තේ කොබෙයිගනේ පොලිස් ස්ථානයට අනුයුක්තව රාජකාරී කළ පොලිස් නිලධාරීන් දෙදෙනෙක්.
මොවුන් දෙදෙනා රථවාහන රාජකාරී සිදුකරන අතරතුර පසුගිය (09) වනදා මාර්ග බාධකයක දී ලොරි රථයක් නවත්වා එහි රියදුරාගේ රියදුරු බලපත්රය අදාළ වාහන පන්තියට අයත් බලපත්රයක් නොවන බවට පවසා තිබෙනවා.
එහිදී එම පොලිස් නිලධාරීන් දෙදෙනා විසින් අදාළ රියදුරාට දහවල් ආහාරය සඳහා ආයතනයෙන් ලබා දී තිබූ රුපියල් 2,000ක මුදලින් රුපියල් 1,500ක මුදලක් අල්ලස් ලෙස ලබාගෙන ඇති බවයි අනාවරණය වී ඇත්තේ.
අදාළ ආයතනයේ හිමිකරු විසින් සිද්ධිය පිළිබඳව වයඹ දිශාව භාර නියෝජ්ය පොලිස්පතිවරයාව දැනුම්වත් කිරීමෙන් පසු සැකකාර පොලිස් නිලධාරීන් දෙදෙනා අත්අඩංගුවට ගෙන අද දිනයේ මෙලෙස නිකවැරටිය අධිකරණය හමුවට ඉදිරිපත් කර තිබෙනවා.
