Telephone:
+94779456435

Email:
editor.todaynewslk@gmial.com

නව පොලිස්පති නීතිඥ ප්‍රියන්ත වීරසූරිය ගෙන් රටටම සහතිකයක්

1 year ago

කොස්තාපල් තනතුරේ සිට පොලිස්පතිවරයා දක්වා පැමිණීමට හැකි වීම ගැන සතුටු වන බවත්, අපරාධ හා ප්‍රචණ්ඩත්වය ගැන බියකින් තොර විශ්වාසයෙන් ජීවත් විය හැකි සාමකාමී පරිසරයක් බිහි කිරීම යථාර්ථයක් බවට පත් කිරීම සඳහා කැපවන බවත් පොලිස්පති නීතිඥ ප්‍රියන්ත වීරසූරිය පවසයි.

ඒ, පොලිස්පතිවරයා ලෙස වැඩ භාර ගැනීමට පැමිණි අවස්ථාවේදී ය.

ශ්‍රී ලංකාවේ 37 වන පොලිස්පති ලෙස ඔහු අද (අගෝස්තු 14) පොලිස් මූලස්ථානයේදී වැඩ භාර ගත්තේ, පොලිස් මූලස්ථානයේදී සිදු විය.

පොලිස් උත්තමාචාර මධ්‍යයේ පොලිස් මුලස්ථානට පැමිණි පොලිස්පතිවරයාට ලැබුණේ උණුසුම් පිළිගැනීමකි.

මෙහිදී සභාව අමතමින් නව පොලිස්පතිවරයා සඳහන් කර සිටියේ, තමාට අට ලෝ දහම හොඳින් හුරු පුරුදු බවත්, පොලීසියේ ගෞරවය හා ප්‍රෞඩත්වය රැකගැනීම වෙනුවෙන් කළ හැකි සෑම දේම තමා සිය රාජකාරිය තුළ ඉටු කරන බවත්ය.

පොලීසියේ දැක්ම අනුව යමින් එය යථාර්ථයක් කිරීමට තමා කටයුතු කරන බවත් ඒ සඳහා සියලු පොලිස් නිලධාරීන්ගේ ඉහළ කාර්ය සාධනයක් බලාපොරොත්තු වන බව ද පොලිස්පති නීතිඥ ප්‍රියන්ත වීරසූරිය පැවසීය.

විනයානුකූල පොලීසියක් සකස් කිරීම තම එකම අභිප්‍රාය බවත් එය තමා ඉහළින්ම සලකන බවත් පැවසු පොලිස්පති ප්‍රියන්ත වීරසූරිය, තමාව පොලිස්පති ධුරයට පත්කළ සියලුදෙනාට ස්තූතිය පළ කරන බවත් කියා සිටියේය.

නීතිඥ ප්‍රියන්ත වීරසුරිය, පොලිස් කොස්තාපල්, උප පොලිස් පරික්ෂක සහ සහකාර පොලිස් අධිකාරි ධුරවල සේවය කරමින්, පොලිස්පති ධුරයට පත් වූ පළමු පොලිස්පතිවරයා ලෙස ඉතිහාසයට එක්වේ.