දුෂණ චෝදනා හේතුවෙන් අල්ලස් කොමිසම විසින් අත්අඩංගුවට ගත් ශ්රී ලංකා දුම්රිය දෙපාර්තමේන්තුවේ හිටපු සාමාන්යාධිකාරී සුමතිපාල මහානාම සහ ශ්රී ලංකා ඉංජිනේරු සංස්ථාවේ හිටපු ක්රියාකාරී අධ්යක්ෂ සරත්චන්ද්ර ගුණරත්න යන දෙදෙනාට කොළඹ මහෙස්ත්රාත් අධිකරණය රුපියල් ලක්ෂ 10 බැගින් ශරීර ඇප නියම කරමින් මුදාහැර තිබේ.
සැකකරුවන්ගේ විදේශ ගමන් තහනම් කර ඇති අතර, සුමතිපාල මහානාම සම්බන්ධ පරීක්ෂණය පෙබරවාරි 20ට කැඳවා ඇත.
ශ්රී ලංකා දුම්රිය දෙපාර්තමේන්තුවේ හිටපු සාමාන්යාධිකාරී සුමතිපාල මහානාම යන සැකකරුව අත්අඩංගුවට ගෙන ඇත්තේ, ශ්රී ලංකා දුම්රිය දෙපාර්තමේන්තුවේ දුම්රිය රියදුරු අයි.එල්.කේ. දිසානායක වෙත ආයතන සංග්රහයේ XLVIII පරිච්ඡේදයේ පළමු උපලේඛනය යටතේ නිකුත්කර තිබූ චෝදනා පත්රයක් අනුව පැවැති විධිමත් විනය පරීක්ෂණයකින් පසුව වරදකරු කර එකී දුම්රිය රියදුරු වහාම ක්රියාත්මක වන පරිදි සේවයෙන් පහකිරීමට දුම්රිය සාමාන්යාධිකාරී බී.ඒ.පී. ආරියරත්න විසින් නිකුත් කර තිබූ විනය නියෝගය සම්පූර්ණයෙන්ම වෙනස්කර ඉහත දුම්රිය රියදුරු සේවයෙන් පහකිරීමට කටයුතු නොකර ඔහුට වාසියක් සිදු කිරීම සම්බන්ධයෙනි.
එමෙන්ම ශ්රී ලංකා ඉංජිනේරු සංස්ථාවේ හිටපු ක්රියාකාරි අධ්යක්ෂවරවෙකු වූ සරත්චන්ද්ර ගුණරත්න ජයතිලක යන සැකකරුව අත්අඩංගුවට ගෙන තිබුණේ, ශ්රී ලංකා රාජ්ය ඉංජිනේරු සංස්ථාවේ සේවකයින් හා දේපල නියමිත ක්රමවේදය අනුගමනය නොකර එක්සත් ජාතික පක්ෂ මූලස්ථානය “සිරිකොත” ගොඩනැගිල්ල අලුත්වැඩියා කිරීමට යොදවීමෙන් රාජ්ය ඉංජිනේරු සංස්ථාවට රුපියල් 1,667,294.87 ක පාඩුවක් ද, එක්සත් ජාතික පක්ෂයට අයුතු ලාභයක් ද සිදුකිරීම සම්බන්ධයෙනි.