2026 වසරේ ගතවූ ඉතා කෙටි කාලය තුළ මෙරට සංචාරක ක්ෂේත්රයේ කැපී පෙනෙන වර්ධනයක් සනිටුහන් කරමින්, දිවයිනට පැමිණි විදෙස් සංචාරකයින් සංඛ්යාව 400,000 සීමාව ඉක්මවා ගොස් තිබේ.
ශ්රී ලංකා සංචාරක සංවර්ධන අධිකාරිය සඳහන් කරන පරිදි, ජනවාරි පළමු වනදා සිට පෙබරවාරි 12 වැනි දින දක්වා වූ කාලය තුළ සංචාරකයින් 401,787 දෙනෙකු මෙරටට පැමිණ ඇත. මෙහි විශේෂත්වය වන්නේ පෙබරවාරි 12 වන දින පමණක් සංචාරකයින් 12,731 දෙනෙකු පැමිණෙමින් වසරේ එක් දිනකදී වාර්තා වූ ඉහළම පැමිණීම සනිටුහන් කිරීමයි.
මෙරටට පැමිණෙන සංචාරකයින් අතර ඉන්දීය ජාතිකයින් ප්රමුඛස්ථානය ගෙන ඇති අතර ඔවුන්ගේ සංඛ්යාව 70,880ක් ලෙස වාර්තා වේ.
මීට අමතරව බ්රිතාන්යයෙන් 44,053ක්, රුසියාවෙන් 36,949ක්, ජර්මනියෙන් 28,332ක් සහ චීනයෙන් 22,309ක් ලෙස වැඩිම සංචාරකයින් පිරිසක් පැමිණි රටවල් ලෙස පිළිවෙළින් වාර්තා වී ඇත. ප්රංශය, ඔස්ට්රේලියාව සහ නෙදර්ලන්තය යන රටවලින් ද සැළකිය යුතු සංචාරකයින් පිරිසක් දිවයිනට පැමිණ ඇති බව සංඛ්යාලේඛන පෙන්වා දෙයි.
පෙබරවාරි මාසයේ මුල් දින 12ක කාලය තුළ පමණක් සංචාරකයින් 124,460 දෙනෙකු මෙරටට පැමිණ තිබීම මෙරට ආර්ථිකයට ඉතා සුබදායී තත්ත්වයක් බව සංචාරක සංවර්ධන අධිකාරිය පවසයි.
