Telephone:
+94779456435

Email:
editor.todaynewslk@gmial.com

ට්‍රම්ප්ගෙන් නැවතත් ඉරානයට තර්ජනයක්

5 months ago

ඉරානය සමඟ නැවතත් යුදමය තත්ත්වයක් ආරම්භ කරන බවට අමෙරිකානු ජනාධිපති ඩොනල්ඩ් ට්‍රම්ප් දැඩි අනතුරු ඇඟවීමක් සිදු කර තිබේ. දෙපාර්ශ්වය අතර යුද්ධය අවසන් කිරීම සඳහා පසුගිය සතියේ එළඹි තාවකාලික සාම ගිවිසුමකට අදාළ පළමු සාකච්ඡා වටය ස්විට්සර්ලන්තයේදී පැවැත්වෙන අතරතුර ඔහු මෙම ප්‍රකාශය සිදු කර ඇත. අමෙරිකානු උප ජනාධිපති ජේ.ඩී. වෑන්ස් සහ ඉරාන නිලධාරීන් අතර මෙම සාකච්ඡා පැවැත්වෙන අතර, අප්‍රේල් මාසයේ සිට පවතින සටන් විරාමය අවම වශයෙන් තවත් දින 60කින් දීර්ඝ කිරීම එහි එක් අරමුණක් බව විදෙස් මාධ්‍ය වාර්තා කර තිබේ.

ගෝලීය බලශක්ති සැපයුමේ ප්‍රධාන මර්මස්ථානයක් වන හෝමුස් සමුද්‍ර සන්ධිය නැවත විවෘත කිරීමටත්, ලෙබනනයේ යුද්ධය නැවැත්වීමටත් මෙම ගිවිසුම හරහා ඉල්ලා තිබුණි. කෙසේ වෙතත්, ලෙබනනයේ සටන් නැවැත්වීමට අමෙරිකාව අපොහොසත් වී ඇති බවට චෝදනා කරන ඉරානය, හෝමූස් සමුද්‍ර සන්ධියේ නාවික ගමනාගමනය යළිත් වරක් නතර කළ බව ප්‍රකාශ කර ඇත. එමෙන්ම, මෙම සාකච්ඡාවලදී සිය න්‍යෂ්ටික වැඩසටහන වැනි ප්‍රධාන කරුණු පිළිබඳව කිසිදු අයුරකින් සාකච්ඡා නොකරන බවද ඉරානය වැඩිදුරටත් අවධාරණය කර සිටියි.

මේ අතර සමාජ මාධ්‍ය ඔස්සේ විශේෂ සටහනක් තබමින් ට්‍රම්ප් ප්‍රකාශ කර ඇත්තේ, ලෙබනනයේ සිටින ඉරානයේ ඉහළ වැටුප් ලබන නියෝජිත කණ්ඩායම් ප්‍රශ්න ඇති කිරීම වහාම නැවැත්විය යුතු බවයි. ඔවුන් එසේ නොකළහොත්, පසුගිය සතියේ මෙන්ම ඊට වඩා බෙහෙවින් දරුණු ලෙස ඉරානයට නැවතත් දැඩි ප්‍රහාර එල්ල කරන බවට ඔහු මාධ්‍ය වෙත අදහස් දක්වමින් පවසා තිබේ. ඉරානය විසින් හෝමුස් සමුද්‍ර සන්ධිය වසා දැමුවහොත් ඔවුන්ට රටක් ඉතිරි නොවන බවට ඉරාන නිලධාරීන්ට අනතුරු අඟවා ඇති අමෙරිකානු ජනාධිපතිවරයා, අවශ්‍ය වුවහොත් එම මුහුදු මාර්ගයේ පාලනය තමන් යටතට ගන්නා බවටද තර්ජනය කර ඇත.