මේ වන විට ආන්දෝලනයට තුඩු දී ඇති දිවයිනේ සුප්රසිද්ධ ආහාර සැපයුම් ජාලය සම්බන්ධයෙන් විමර්ශනයක් සිදු කර, කඩිනමින් වාර්තාවක් ලබා දෙන ලෙස කම්කරු නියෝජ්ය අමාත්ය මහින්ද ජයසිංහ විසින් කම්කරු දෙපාර්තමේන්තුවට උපදෙස් ලබා දී තිබෙනවා.
ඒ අනුව, අදාළ ආහාර සැපයුම් ජාලයේ හිමිකරු බව කියන පුද්ගලයකු විසින් එහි සේවකයන් වාචික සහ කායික හිංසනයට ලක් කිරීමේ සිදුවීම් පිළිබඳව ද සොයා බලන ලෙස නියෝජ්ය අමාත්යවරයා උපදෙස් ලබා දී ඇති බවයි සඳහන් වන්නේ.
ඊට අමතරව, කම්කරු නීතිරීතිවලට අනුකූලව සේවක අර්ථසාධක අරමුදල (EPF) සහ සේවක භාරකාර අරමුදල (ETF) සේවකයන් වෙනුවෙන් නිසි පරිදි ගෙවා තිබේ ද යන්න මෙහිදී සොයා බැලීමට නියමිතයි.
මෙම ආහාර සැපයුම් ජාලයේ ශාඛා 12 ක් දිවයින පුරා පිහිටා ඇති අතර, ඒවා වෙන් වෙන් ව කම්කරු නිලධාරීන් විසින් සමූහ පරීක්ෂාවකට ලක් කිරීමට අපේක්ෂිතයි.
එමෙන්ම ඇතැම් ශාඛා පසුගිය කාලය තුළ වසා දමා ඇති බවට තොරතුරු වාර්තා වන අතර, ඒවා වසා දැමීමේදී එහි සේවකයන්ට නීත්යානුකූලව හිමි විය යුතු වන්දි ආදිය ලබා දී තිබේ ද යන්න සොයා බලන ලෙස ද කම්කරු නියෝජ්ය අමාත්ය මහින්ද ජයසිංහ විසින් දැනුම් දී ඇති බවයි වැඩිදුරටත් සඳහන් වන්නේ.
අදාළ නිවේදනය පහතින්.

