Telephone:
+94779456435

Email:
editor.todaynewslk@gmial.com

අයවැය මැද වෘත්තීය සමිති නායකයෙකු අත්අඩංගුවට ගැනීම ගැන නාමල්ගෙන් විශේෂ “X” සටහනක්

2 days ago

2027 අයවැයට එරෙහිව නැගෙන විරෝධය මැඩපැවැත්වීමේ උත්සාහයක් ලෙස විපක්ෂයට සම්බන්ධ වෘත්තීය සමිති නායකයෙකු අත්අඩංගුවට ගෙන ඇත්දැයි ශ්‍රී ලංකා පොදුජන පෙරමුණේ (SLPP) ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ ප්‍රශ්න කරනවා.

සිය ‘X’ ගිණුමේ සටහනක් තබමින් මන්ත්‍රීවරයා පෙන්වා දෙන්නේ, ඕනෑම වරදක් සම්බන්ධයෙන් සිදු කෙරෙන පූර්ණ, අපක්ෂපාතී සහ විනිවිදභාවයකින් යුත් විමර්ශනයක් කිසිවෙකු ප්‍රශ්න නොකරන නමුත් මෙම අත්අඩංගුවට ගැනීම සිදු වූ කාලවකවානුව “අතිශය කැපී පෙනෙන” බවයි.

“අයවැය පිළිබඳව වෘත්තීය සමිති සිය අප්‍රසාදය පළ කරමින් සහ අසාධාරණකම්වලට එරෙහිව සංවිධානය වෙමින් සිටින මොහොතක, විපක්ෂයට සම්බන්ධ වෘත්තීය සමිති නායකයෙකු අත්අඩංගුවට ගෙන තිබෙනවා. මෙය හුදෙක් අහම්බයක්ද, නැතහොත් විරුද්ධ මත අධෛර්යමත් කිරීමට සහ වර්ධනය වන වෘත්තීය සමිති ව්‍යාපාරය මැඩපැවැත්වීමට රජය දරන උත්සාහයක්ද?” යනුවෙන් ඔහු විමසනවා.

වත්මන් ආණ්ඩුවේ ක්‍රියාකලාපය තුළ පවතින උත්ප්‍රාසාත්මක බව දැඩිව විවේචනය කර ඇති නාමල් රාජපක්ෂ පැවති රජයන්ට එරෙහිව වසර ගණනාවක් පුරා විරෝධතා, වැඩවර්ජන සහ වෘත්තීය සමිති අරගලවල පෙරමුණ ගත් දේශපාලන ව්‍යාපාරයක්, අද තමන්ට එරෙහිව එවැනිම හඬක් නගන විට නොසන්සුන් වී ඇති බවයි ඔහු සඳහන් කරන්නේ.

“විපක්ෂයේ සිටින විට විරෝධතා දැක්වීමේ අයිතිය වෙනුවෙන් පෙනී සිටීම පහසුයි. නමුත් ප්‍රජාතන්ත්‍රවාදයේ සැබෑ පරීක්ෂණය වන්නේ බලයට පත් වූ පසුත් එම අයිතියටම ගරු කරනවාද යන්නයි,” යනුවෙන් පවසන ඔහු, විරුද්ධ මතධාරීන් බිය ගැන්වීමට හෝ නිහඬ කිරීමට ‘වගවීම’ කිසිවිටෙකත් කඩතුරාවක් කර නොගත යුතු බවද අවධාරණය කර තිබෙනවා.

නවතම පුවත් (Latest News)