අනුරාධපුර රුවන්වැලි මහා සෑය ආසන්නයේ දන්සැල් කලාපයේ පැවති සත්යග්රහ භූමියේදී ඇති වූ ගැටුමට මුල් වූ බව කියන රාජාංගනයේ සද්ධාරතන ඇතුළු සෙසු සැකකරුවන් අත්අඩංගුවට ගෙන අධිකරණයට ඉදිරිපත් නොකිරීම සම්බන්ධයෙන් කරුණු දක්වන ලෙස අනුරාධපුර කොට්ඨාස භාර ජ්යෙෂ්ඨ පොලිස් අධිකාරීවරයාට (SSP) අධිකරණය නියෝග කර තිබේ.
ඒ අනුව, එළැඹෙන නොවැම්බර් 26 වැනිදා විවෘත අධිකරණය හමුවේ පෞද්ගලිකව පෙනී සිට ඒ සම්බන්ධයෙන් කරුණු දක්වන ලෙස අනුරාධපුර ප්රධාන මහේස්ත්රාත් සියපත් සසිඳු වික්රමරත්න මහතා අද (17) නියෝග කළේය.
අධිකරණ ක්රියාවලියේ ප්රධාන කරුණු:
- ඇප ඉල්ලීම ප්රතික්ෂේප කෙරේ: අදාළ ගැටුම සම්බන්ධයෙන් නොවැම්බර් 26 දක්වා රක්ෂිත බන්ධනාගාරගත කර සිටින බලංගොඩ කස්සප හිමියන් හැර සෙසු භික්ෂූන් වහන්සේ සිව්නමක්, පිරිමි පුද්ගලයන් දෙදෙනෙකු සහ කාන්තාවක ඇප මත මුදාහරින ලෙස නීතිඥ ඉන්දික ඉඹුල්පිටිය සහ නුවන් බැල්ලන්තුඩාව යන මහත්වරුන් ඉදිරිපත් කළ මෝසම සලකා බැලූ ප්රධාන මහේස්ත්රාත්වරයා, එම ඇප ඉල්ලීම ප්රතික්ෂේප කළේය.
- නීතිඥවරුන්ගේ චෝදනා: ගැටුමට මුල් වූ බව කියන රාජාංගනයේ සද්ධාරතන ඇතුළු 25කට අධික පිරිසක් අත්අඩංගුවට ගෙන ඉදිරිපත් කළ යුතු වුවද පොලිසිය එසේ නොකරන බව නීතිඥවරු පෙන්වා දුන්හ.
- පොලිස් ක්රියාකලාපය ගැන ප්රශ්න: ගැටුම වළක්වා ගැනීමට හැකියාව තිබියදීත් එය නොකළ බවටත්, වීඩියෝ දර්ශන නිරීක්ෂණය කිරීමේදී ගැටුම මෙහෙයවීම සම්බන්ධයෙන් පොලිස් නිලධාරීන් පිළිබඳවද සැකයක් මතුවන බවටත් නීතිඥවරු අධිකරණය හමුවේ චෝදනා කළහ.
