Telephone:
+94779456435

Email:
editor.todaynewslk@gmial.com

ඇෆ්ගනිස්තාන තරගාවලියේදී පැතුම් නිස්සංක වාර්තා රැසක් අලුත් කරයි

3 years ago

ශ්‍රී ලංකා – ඇෆ්ගනිස්තාන එක්දින ක්‍රිකට් තරගාවලිය ඊයේ (14) අවසන් වූයේ, ශ්‍රී ලංකාවට පූර්ණ තරගාවලි ජයග්‍රහණයක් (Whitewash) අත් කර දෙමිනි.

කෙසේ වෙතත් මෙම එක්දින තරගාවලිය තුළ වඩාත් කතාබහට ලක් වූයේ, පැතුම් නිස්සංකගේ විශිෂ්ට පිතිකරණය යි.

මේ අතර නිමා වූ තරගාවලිය තුළ වාර්තා කිහිපයක් ද අලුත් වූ අතර, ඒ අතර පැතුම් නිස්සංක තැබූ වාර්තා කිහිපයක් ම හඳුනාගත හැකි ය.

ශ්‍රී ලංකාව වෙනුවෙන් ද්විත්ව ශතකයක් වාර්තා කළ පළමු සහ එක ම ක්‍රීඩකයා බවට පත් වීමට පල්ලෙකැලේ අන්තර්ජාතික ක්‍රිකට් ක්‍රීඩාංගණයේ පැවති පළමු එක්දින තරගයේ දී පැතුම් නිස්සංකට හැකි විය.

මෙම දස්කම දැක්වූ ලොව පස් වැනියා වන්නේ ද පැතුම් නිස්සංක වන අතර, ලෝකයට ම ඇත්තේ, එක්දින ද්විත්ව ශතක 12ක් පමණි.

එසේම 2000 වසරේ ඔක්තෝබර් මාසයේ සාජා ක්‍රීඩාංගණයේ දී ලකුණු 189ක් ලබා ගනිමින් ශ්‍රී ලංකාව වෙනුවෙන් පිතිකරුවකු රැස් කළ වැඩිම ලකුණු සංඛ්‍යාවේ වාර්තාව බිඳ දැමීමට ද පැතුම් නිස්සංක සමත් විය.

ඔහු අතින් බිඳ වැටුණේ, සනත් ජයසූරිය නමින් වසර 23ක් සුරැකි ව තිබුණු ශ්‍රී ලංකා වාර්තාවකි.

පැතුම් සිය ඉනිමේ දී නො දැවී ලකුණු 210ක් වාර්තා කළ අතර, ඒ සඳහා ඔහු වැය කළේ පන්දු 136ක් පමණි.

එය ලොව තෙවැනි වේගවත්ම එක්දින ද්විත්ව ශතකය ලෙසට ද වාර්තා අතරට එක් විය.

එහි පළමු සහ දෙවැනි ස්ථානවල පසු වන්නේ, ඔස්ට්‍රේලියානු ක්‍රීඩක ග්ලේස් මැක්ස්වෙල් සහ ඉන්දීය ක්‍රීඩක ඉෂන් කිෂන් ය.

මේ අතර, පැතුම්ගේ ඉනිම තුළ තවත් ශ්‍රී ලංකා වාර්තාවක් ද අලුත් විය.

එනම් 04 සහ 06 පහරවලින් ශ්‍රී ලාංකේය ක්‍රීඩකයකු රැස් කළ වැඩිම ලකුණු ගණනේ වාර්තාව යි.

පැතුම් නිස්සංක මෙම ඉනිමේ දී හතරේ පහර 20ක් සහ හයේ පහර 08ක් සමඟින් ලකුණු 128ක් රැස් කළේ ය.

මීට පෙර එම වාර්තාව තබා තිබුණේ, සනත් ජයසූරිය සහ තිසර පෙරේරා ලකුණු 110 බැගින් ලබාගෙන ය.

මෙම ඉනිමේ දී ශ්‍රී ලංකා කණ්ඩායම ලකුණු 381ක් රැස් කළ අතර, එය ශ්‍රී ලංකාව තුළ ශ්‍රී ලංකා කණ්ඩායම එක්දින ඉනිමක දී රැස් කළ ඉහළ ම ලකුණු සංඛ්‍යාවේ වාර්තාව වේ.

එසේම ශ්‍රී ලංකාව ලෝකයේ දී රැස් කළ ඉහළම 04 වැනි ලකුණු සංඛ්‍යාව ද මෙය යි.

මේ අතර, ඊයේ අවසන් වූ තුන් වැනි එක්දින තරගයේ දී ද ශතකයක් වාර්තා කිරීමට පැතුම් නිස්සංකට හැකි විය.

ඒ සමඟ ලකුණු 2,000 සීමා ඉක්මවා ගිය වේගවත්ම ශ්‍රී ලාංකේය ක්‍රීඩකයා බවට පත් වීමට පැතුම් නිස්සංක සමත් විය.

ඒ සඳහා ඔහු වැය කර තිබුණේ, ඉනිම් 52කි.

මේ අතර, තරග 03කින් සමන්විත එක්දින තරගාවලියක දී ලාංකික පිතිකරුවකු රැස් කළ ඉහළ ම ලකුණු සංඛ්‍යාවේ ශ්‍රී ලංකා වාර්තාව ද තමාගේ නමට ලියා ගැනීමට පැතුම් නිස්සංකට ඊයේ හැකි විය.

ඔහු තරග 03 දී ලකුණු 346ක් වාර්තා කළේ ය.

එසේම එය ලෝකයේ 04 වැනි ඉහළම ලකුණු ගණන ද වේ.

එහි පළමු ස්ථානය ඉන්දීය ක්‍රීඩක ශුබ්මන් ගිල්ට හිමි වී ඇති අතර, ඔහු තරග 03කින් සමන්විත තරගාවලියක දී ලකුණු 360ක් රැස් කර තිබිණි.

නවතම පුවත් (Latest News)