උතුරු මැද පළාතේ 11 ශ්රේණිය වාර විභාගයට අදාළ සිංහල සාහිත්ය ප්රශ්න පත්රය සමාජ මාධ්ය ඔස්සේ පිටවී ඇතැයි තහවුරු වී තිබෙනවා.
මේ හේතුවෙන් උතුරු මැද පළාතේ පාසල්වල අද (06) දින පැවැත්වීමට තිබූ අවසන් වාර විභාගය කල්දැමීමට කටයුතු කළ බව උතුරු මැද පළාත් අධ්යාපන සහ ප්රධාන අමාත්යාංශ ලේකම් සිරිමෙවන් ධර්මසේන මහතා පැවසුවා.
ඒ අනුව, අද උදෑසන වනවිට කලාප 8ක කොට්ඨාස 30කට අයත් පාසල් 600කට අධික ප්රමාණයක අදාළ ප්රශ්න පත්රය බෙදාහැරීම නවත්වා තිබෙනවා.
ඔහු වැඩිදුරටත් කියා සිටියේ, සමගාමීව විභාගය තාවකාලිකව අත්හිටුවා වෙනත් ප්රශ්නපත්රයක් ලබාදීමට කටයුතු කරන බවයි.
අනුරාධපුර මුලස්ථාන පොලීසිය සිද්ධිය සම්බන්ධයෙන් පැමිණිල්ලක් සිදුකර ඇතැයි ද පැවසු ඒ මහතා, අක්රමිකතාව සිදුවුයේ කෙසේ ද යන්න සොයා බැලීමට කටයුතු කරන බව ද කියා සිටියා.
උතුරු මැද පළාතේ දිගින් දිගටම සිදුවන මෙම විභාග වංචාවන් පිළිබදව ලංකා ගුරු සංගමයේ සභාපති ප්රියන්ත මහතා තොරතුරු අනාවරණය කරමින් මෙසේ පැවසුවා.
“අද දිනයේ පැවැත්වීමට නියමිතව තිබූ 11 ශ්රේණියේ සිංහල රසාස්වාදය ප්රශ්න පත්රය අනුරාධපුර හා පොළොන්නරුව දිස්ත්රික්කයේ උපකාරක පන්තිවල පසුගිය ඉරිදා දින සිසුන්ට උගන්වා ඇති බවට තොරතුරු අනාවරණය වීමත් සමග උතුරු මැද පළාත් විභාග අධ්යක්ෂකවරයා විසින් මේ පිළිබඳ තහවුරු කර ගැනීමෙන් අනතුරුව එම ප්රශ්න පත්රය පැවැත්වීම අත්හිටුවිමට පියවර ගත්තා.
මෙම ප්රශ්න පත්රය මුද්රණය කිරිම සඳහා රුපියල් 150,000ක මුදලක් වැය කර තිබෙනවා. පසුගිය සතියේද උතුරු මැද පළාතේ 6 ශ්රේණියේ භූගෝල විද්යාව ප්රශ්න පත්රය පිටවීම සිදුකළ ගුරුවරියක් සම්බන්ධයෙන් විනය පරීක්ෂණ මේ වන විට ආරම්භ කර තියෙනවා. එම ප්රශ්න පත්රයේ මුද්රණය කිරීම සඳහා වැය වී ඇති මුදල රුපියල් 250000 වෙනවා. මේ ආකාරයට දිගින් දිගටම උතුරු මැද පළාතේ සිදුවන මේ විභාග වංචාවන් පිළිබඳව වරින් වර වාර්තා වුවත් බොහෝ විට එවැනි ගුරුවරුන් වෙනුවෙන් ලිහිල් ප්රතිපත්ති අනුගමනය කිරීම නිසා මෙම විභාග වංචාවන් දිගින් දිගටම සිදුවෙනවා.
