බීමතින් රිය අනතුරක් සිදුකළ පුද්ගලයෙකු අත්අඩංගුවට ගැනීමට විරෝධය පළකරමින් පාදුක්ක පොලිස් ස්ථානයේ නිලධාරින්ට බැන තර්ජනය කළ සීතාවක ප්රාදේශීය සභාවේ හිටපු මන්ත්රීවරයා එළැඹෙන 29 වැනිදා දක්වා රක්ෂිත බන්ධනාගාර ගත කර තිබෙනවා.
පාදුක්ක මාවත්ගම ප්රදේශයේදී ත්රීරෝද රථයක් හා මොටර් රථයක් එකිනෙක ගැටී ඊයේ (15) පස්වරුවේ අනතුරක් සිදුව තිබුණා.
මේ හේතුවෙන් මෝටර් රථයේ රියදුරු අත්අඩංගුවට ගැනීමට පාදුක්ක පොලිසියේ රථ වාහන අංශයේ නිලධාරින් කටයුතු කළ අතර මොටර් රථයද පොලිස් භාරයට ගැණුනා.
කෙසේවෙතත් මෝටර් රථයේ රියදුරු අත්අඩංගුවට ගැනීමට විරෝධය දක්වමින් පාදුක්ක පොලිස් ස්ථානයට පැමිණි සීතාවක ප්රාදේශීය සභාවේ හිටපු එක්සත් ජාතික පක්ෂ සභිකයෙක් පොලිස් නිලධාරින්ට බැන වැදී තිබුණා.
එහිදී පාදුක්ක පොලිසියේ රථවාහන අංශයේ ස්ථානාධිපතිවරයාට පහරදීමට ඔු උත්සාහ දරා ඇති අතර දැඩි පරිශ්රමයක් දරා ඔහුව සිර මැදිරියට ඇතුළු කිරීමට පොලීසිය කටයුතු කළා.
නමුත් එහිදී තමාට අසනීප බවත් සිර මැදිරියේ රැඳී සිටීමට නොහැකි බවත් පැවසීහ හේතුවෙන් පොලිසිය සැකකරුව හෝමාගම මූලික රෝහලට ඇතුළත් කර තිබෙනවා.
රෝහල තුළත් සැකකරු කලහකාරි ලෙස හැසිරුණු බව වාර්තා වනවා.
මේවන විට සැකකරු පොලිස් ආරක්ෂාව මධ්යයේ ප්රතිකාර ලබන අතර ඔහුගේ පහරදීමෙන් තුවාල ලැබූ පාදුක්ක පොලිසියේ රථ වාහන අංශයේ ස්ථානාධිපතිවරයාත් එම රෝහලේම ප්රතිකාර ලබමින් සිටිනවා.
අත්අඩංගුවට පත් මෝටර් රථයේ රියදුරු මෙම සැකකරුගේ හිතවතෙක් වන අතර ඔවුන් දෙදෙනා ඊයේ සවස මත්පැන් පානය කරමින් සිට ඇති බවට පොලිසියට තොරතුරු වාර්තා වී තිබෙනවා.
අත්අඩංගුවට ගත් ප්රාදේශීය සභා මන්ත්රීවරයා හංවැල්ල තුන්නාන ප්රදේශයේ පදිංචිකරුවකු වන අතර ඔහු සීතාවක ප්රාදේශිය සභාවේ හිටපු එක්සත් ජතික පක්ෂයේ සභිකයෙකු සහ පසුව සමගි ජන බලවේගයේ කොළඹ දිස්ත්රික් තරුණ කටයුතු ලේකම්වරයෙකු ලෙස කටයුතු කරන අයෙකු බව පොලීසිය පවසනවා.
