ශ්රී ලංකා වරාය අධිකාරිය (SLPA) විසින් රජයේ ඒකාබද්ධ අරමුදල වෙත රුපියල් බිලියන පහක (රු. 5,000,000,000) මුදලක් ප්රදානය කර තිබේ. 2024 සහ 2025 වර්ෂයන්හි වරාය අධිකාරිය ලැබූ ඉහළ මූල්ය කාර්යසාධනය පදනම් කරගනිමින් මෙම මුදල භාණ්ඩාගාරය වෙත නිල වශයෙන් භාරදීම අද සිදු විය.
මුදල් අමාත්යාංශ පරිශ්රයේදී පැවති මෙම අවස්ථාවට වරාය හා සිවිල් ගුවන්සේවා අමාත්ය අනුර කරුණාතිලක මහතා ප්රමුඛ වරාය අධිකාරියේ නිලධාරී පිරිසක් සහභාගී වූහ. රුපියල් බිලියන පහක මුදලට අදාළ චෙක්පත නියෝජ්ය මුදල් අමාත්ය අනිල් ජයන්ත සහ මුදල් අමාත්යාංශයේ ලේකම් හර්ෂණ සූරියප්පෙරුම යන මහත්වරුන් විසින් භාරගනු ලැබීය.
වරාය අධිකාරිය සඳහන් කරන පරිදි මෙම ප්රදානය අදියර දෙකකින් සිදු කර ඇත:
- පළමු අදියර: මීට පෙර රුපියල් බිලියන දෙකක මුදලක් භාරදෙන ලදී.
- දෙවන අදියර: ඉතිරි රුපියල් බිලියන තුනක මුදල අද දින භාරදීමට කටයුතු කර තිබේ.
2024 වසරේ උපයාගත් ලාභාංශ සහ 2025 වසර තුළ වරාය මෙහෙයුම් වඩාත් කාර්යක්ෂම ලෙස කළමනාකරණය කිරීම මෙම දැවැන්ත ප්රදානයට මූලික හේතුව වී ඇත. විශේෂයෙන්ම, 2025 වසරේ නොවැම්බර් 30 වැනිදා වන විට වරාය අධිකාරිය රුපියල් මිලියන 44,110 ක ශුද්ධ ලාභයක් උපයා ගැනීමට සමත්ව තිබේ. මෙහෙයුම් ධාරිතාව ඉහළ නංවා ගැනීම හරහා මෙම සාර්ථකත්වය ළඟා කරගත් බව අධිකාරිය වැඩිදුරටත් අවධාරණය කළේය.
