මෝටර් රථ ප්රවාහන දෙපාර්තමේන්තුවේ නීත්යානුකූල නොවන අයුරින් වාහන ලියාපදිංචි කිරීමේ ජාවාරමකට සම්බන්ධ වූ බවට එල්ල වූ චෝදනා මත එම දෙපාර්තමේන්තුවේ සේවය කළ නිලධාරීන් තිදෙනෙකු අද (26) අල්ලස් හෝ දූෂණ චෝදනා විමර්ශන කොමිෂන් සභාව විසින් අත්අඩංගුවට ගෙන තිබේ.
අත්අඩංගුවට ගත් නිලධාරීන් සහ චෝදනා:
- හිටපු සහකාර කොමසාරිස්වරයා: නීත්යානුකූල මුල් ලියාපදිංචියක් නොමැති වාහන 03ක් නීත්යානුකූල නොවන අයුරින් පැවරීමට අනුමැතිය ලබාදීමේ චෝදනාව මත.
- හිටපු සංවර්ධන සහකාර (මාර්ග ආරක්ෂාව): අදාළ වාහනවල පැවරීම් සිදුකිරීම සඳහා දත්ත පද්ධතියට තොරතුරු ඇතුළත් කිරීමේ චෝදනාව මත.
- හිටපු විමර්ශන සහකාර: නීත්යානුකූල නොවන පැවරීම් සිදුකිරීම සඳහා අවශ්ය වන කවුළු අංක (Counter Numbers) නිකුත් කිරීමේ චෝදනාව මත.
අල්ලස් හෝ දූෂණ චෝදනා විමර්ශන කොමිෂන් සභාව සඳහන් කරන්නේ, නීත්යානුකූල ලියාපදිංචියක් නොමැති වාහන පද්ධතියට ඇතුළත් කර නීත්යානුකූල වාහන ලෙස පෙන්වීමට මෙම නිලධාරීන් කටයුතු කර ඇති බවයි. අත්අඩංගුවට ගත් සැකකරුවන් තිදෙනා අද දින කොළඹ ප්රධාන මහේස්ත්රාත් අධිකරණය වෙත ඉදිරිපත් කිරීමට නියමිතව ඇත.
