Telephone:
+94779456435

Email:
editor.todaynewslk@gmial.com

2019 අගෝස්තු මාසයට පෙර ලබා ගන්නා ලද SIM කාඩ්පත් ඇති අයට දැනුම්දීමක්

9 months ago

ශ්‍රී ලංකාවේ භාවිත වන සියලුම සිම් කාඩ්පත් (SIM) ලියාපදිංචි කිරීමේ රෙගුලාසි සංශෝධනය කිරීමට සහ 2019 අගෝස්තු 02 දිනට පෙර ලබාගත් පැරණි සිම් කාඩ්පත් නැවත ලියාපදිංචි කිරීමට අමාත්‍ය මණ්ඩල අනුමැතිය හිමිව තිබේ.

ජනාධිපතිවරයා විසින් ඩිජිටල් ආර්ථික අමාත්‍යවරයා ලෙස ඉදිරිපත් කළ මෙම යෝජනාවට මෙලෙස අනුමැතිය හිමිව ඇත.

පවතින නීතිමය පසුබිම අනුව, සිම් පත් ලියාපදිංචි කිරීමේ රෙගුලාසි අදාළ වන්නේ 2019 අගෝස්තු 02 දිනෙන් පසුව නිකුත් කළ කාඩ්පත් සඳහා පමණි.

මේ හේතුවෙන් ඊට පෙර ලියාපදිංචි වූ ඇතැම් ග්‍රාහකයින් පිළිබඳ නිවැරදි තොරතුරු දුරකථන සමාගම් සතුව නොමැති බව අනාවරණය වී තිබේ.

මෙම තත්ත්වය අපරාධ විමර්ශන කටයුතුවලදී බරපතළ බාධාවක් වී ඇති බැවින් සියලුම පැරණි ග්‍රාහකයින්ගේ තොරතුරු යාවත්කාලීන කිරීම අනිවාර්ය කිරීමට තීරණය කර ඇත.

මෙම නව සංශෝධන හරහා වයස අවුරුදු 16 – 17 අතර ග්‍රාහකයින් ලියාපදිංචි කිරීම සඳහා නව විධිවිධාන හඳුන්වා දීමට ද නියමිතය.

මීට අමතරව මෙරටට පැමිණෙන විදේශිකයන්ට සිම් කාඩ්පත් නිකුත් කිරීමේදී අනුගමනය කළ යුතු නව ක්‍රියාපටිපාටියක් ද මෙම රෙගුලාසිවලට ඇතුළත් වේ.

වර්තමාන ආරක්ෂක සහ තාක්ෂණික අවශ්‍යතාවන්ට ගැළපෙන පරිදි 1991 අංක 25 දරන ශ්‍රී ලංකා විදුලි සංදේශ පනත යටතේ පවතින රෙගුලාසි මෙලෙස සංශෝධනය කෙරෙනු ඇත.