Telephone:
+94779456435

Email:
editor.todaynewslk@gmial.com

හිටපු ඇමති රාජිත සේනාරත්නට එරෙහිව අධි චෝදනා ගොනු කිරීමට සැරසෙයි

4 months ago

කිරින්ද ධීවර වරායේ වැලි කැණීමේ ව්‍යාපෘතියක් කොරියානු සමාගමකට ලබාදීම තුළින් රජයට රුපියල් කෝටි දෙකකට අධික මූල්‍ය පාඩුවක් සිදුකළේ යැයි කියන දූෂණ චෝදනාව සම්බන්ධයෙන් හිටපු ධීවර අමාත්‍ය රාජිත සේනාරත්න සහ ධීවර වරාය නීතිගත සංස්ථාවේ හිටපු සභාපති උපාලි ලියනගේ යන මහත්වරුන්ට එරෙහිව මහාධිකරණය හමුවේ අධි චෝදනා ගොනු කිරීමට පියවර ගන්නා බව අල්ලස් හෝ දූෂණ චෝදනා විමර්ශන කොමිෂන් සභාව අද (10) අධිකරණයට දැනුම් දුන්නේය.

මෙම සිද්ධියට අදාළ නඩුව අද කොළඹ ප්‍රධාන මහේස්ත්‍රාත් අසංග එස්. බෝදරගම මහතා හමුවේ කැඳවනු ලැබූ අවස්ථාවේදී අල්ලස් කොමිසමේ නිලධාරීන් මේ බව සභාවට ප්‍රකාශ කළේය.

අධිකරණය හමුවේ වැඩිදුරටත් කරුණු දැක්වූ අල්ලස් කොමිසමේ නීතිඥවරුන් කියා සිටියේ, අදාළ සැකකරුවන් දෙදෙනාට එරෙහිව පවත්වාගෙන ගිය දීර්ඝ විමර්ශන කටයුතු මේ වන විට සම්පූර්ණයෙන්ම අවසන් කර ඇති බැවින්, ඉදිරි පියවරක් ලෙස මහාධිකරණය හමුවේ අධි චෝදනා පත්‍ර ගොනු කිරීමට කටයුතු සූදානම් කරමින් පවතින බවයි.

අද දින නඩුව කැඳවූ අවස්ථාවේදී සැකකාර හිටපු අමාත්‍ය රාජිත සේනාරත්න සහ හිටපු සභාපති උපාලි ලියනගේ යන මහත්වරු අධිකරණය හමුවේ පෙනී සිටියහ. මෙම සිද්ධිය සම්බන්ධයෙන් මීට පෙර අත්අඩංගුවට ගෙන රක්ෂිත බන්ධනාගාරගත කර සිටි මොවුන් දෙදෙනා දැනට ඇප මත මුදාහැර සිටී. ඉදිරිපත් වූ කරුණු සලකා බැලූ ප්‍රධාන මහේස්ත්‍රාත්වරයා, මෙම නඩුව නැවත එළඹෙන දෙසැම්බර් මස 04 වැනිදා යළි කැඳවීමට නියෝග කළේය.