Telephone:
+94779456435

Email:
editor.todaynewslk@gmial.com

අලුත් රු. 2000 සමරු මුදල් නෝට්ටු මිලියන 50ක් අද සිට සංසරණයට! නිකුත් කළ අලුත්ම නෝට්ටුව මෙන්න! (ඡායාරූප)

1 year ago

රු. 2000ක වටිනාකමකින් යුතු සමරු මුදල් නෝට්ටුවක් අද (29) දින ශ්‍රී ලංකා මහ බැංකුව විසින් නිකුත් කරන ලදී. මහ බැංකුව පවසන්නේ මෙය නෝට්ටු මිලියන 50ක සීමිත නිකුතුවක් බවයි.

ඒ අනුව මෙය අද සිට බලපත්‍රලාභී වාණිජ බැංකු හරහා ක්‍රමයෙන් මුදල් සංසරණයට නිකුත් කෙරෙනු ඇත.

මෙම මුදල් නෝට්ටුව ශ්‍රී ලංකාව තුළ ඕනෑම මුදල් ප්‍රමාණයක් ගෙවීම සඳහා වලංගු වන අතර මුදල් සංසරණයේ පවතින තාක් ශ්‍රී ලංකා මහ බැංකුවේ වගකීමක් වේ.

ශ්‍රී ලංකා මහ බැංකුව සිය 75 වන සංවත්සරය සැමරීම නිමිත්තෙන් මෙම සමරු මුදල් නෝට්ටුව නිකුත් කරන ලදී. ජාතික සංවර්ධනය සඳහා පදනම ලෙස ආර්ථික ස්ථාවරත්වය වර්ධනය කිරීම වෙනුවෙන් මහ බැංකුවේ නොනවතින කැපවීම පිළිබිඹු කරමින්, මෙම මුදල් නෝට්ටුව “සමෘද්ධිය සඳහා ස්ථාවරත්වය” යන සංවත්සර තේමාවට අනුකූල වේ. මෙය ශ්‍රී ලංකා මහ බැංකුව විසින් නිකුත් කරන ලද 5 වන සමරු මුදල් නෝට්ටුවයි.

අද (29) උදෑසන, මහ බැංකු අධිපති ආචාර්ය පී. නන්දලාල් වීරසිංහ මහතා විසින් ජනාධිපති කාර්යාලයේ දී මෙම සමරු මුදල් නෝට්ටුව ජනාධිපති සහ මුදල්, ක්‍රමසම්පාදන සහ ආර්ථික සංවර්ධන අමාත්‍ය අනුර කුමාර දිසානායක මහතා වෙත නිල වශයෙන් පිළිගන්වන ලදී.