පින්වත්ත හෝටලයක අභිරහස් ලෙස ඝාතනය කර වැසිකිළි වළක් තුළ දමා තිබී ඉකුත් මාර්තු 29 වනදා හමුවූ දෙදරු මවගේ මරණය සම්බන්ධයෙන් ප්රධාන සැකකරු මාස අටකට පසුව අත්අඩංගුවට ගෙන තිබේ.
සැකකරු එවකට හෝටලයේ කළමනාකරු ලෙසින් සේවය කර ඇති අය බව ද පොලිසිය කීය.
තුෂාරී දිල්හානී නැමැත්තියගේ මළසිරුර සොයාගැනිමට පෙරදින රාත්රී හෝටල් පරිඝණකයේ දත්ත මකාදමා පුද්ගලික ලියකියවිලිද රැගෙන පානදුර සිට මාතර ඔස්සේ ඇඹිලිපිටිය බලා ගමන්කර ඇති බවත් ඒ අතරතුර සිය සිම් කාඩ්පත කඩා විසිකර තිබූ බවට පරීක්ෂණවලදී හෙලිව ඇති බවත් උසස් පොලිස් නිලධාරීයෙක් කීය.
ඝාතනයට ලක් වූ කාන්තාව මෙම ඝාතනයට දින කීපයකට පෙර හදුනාගෙන ඇති බවත් කඩවත රාත්රි සමාජ ශාලවක සිට පානදුර හෝටලයකට කැටුවවිත් එහි කාමරයේ රදවා තවත් පුද්ගලයන් තිදෙනකු සමග වරින්වර ඇය සමග එකට සිට ඇති බවත් හෙලිව ඇතැයිද පොලිසිය කීය.
කාන්තාවගේ සිරුර වැසිකිළිවලට දමා එය වසාදමා ඇයගේ ගමන් බෑගය මුහුදු වෙරළට ගොස් පුළුස්සා දැමු බවට හෙලිව ඇතැයිද පොලිසිය සදහන් කරයි.
ඔහු ඇඹිලිපිටිය සෙවනගල ප්රදේශයේ සැඟව සිටියදී අත්අඩංගුවට ගැනීමට පානදුර කොට්ඨාස අපරාධ විමර්ශන ඒකකය සමත්ව ඇත.
ඇඹිලිපිටිය ප්රදේශයට පළාගොස් ඇති සැකකරු පොලීසියෙන් මිදීම සඳහා වරින්වර පදිංචිය වෙනස් කරමින් සිට ඇති බවද සඳහන් වෙයි.
සැකකරු පානදුර මහෙස්ත්රාත් අධිකරණයට ඉදිරිපත් කිරීමට නියමිතව තිබේ.
